Da isch de Ursprung gsi. Irgendwen im 2021 bini uft Schnappsidee mit Bschötti cho. I ha nöd mol gwüsst wa füren Gschmack oder wie die Fläsche usgseh söll, aber glich hani rasch 100 Fläsche verchauft. Nocher hani dä lustig Tropfe mit de Appenzeller Edelbrand AG hergstellt und usglieferet. Kurz druf abe sind scho di erste Getränkehändler cho und paar regionali Zitige hend über mi brichtet. Bschötti chaufe.

Noch öpe eim Johr hani gmerkt dass Bschötti eigentli nur i de Ostschwiz chli en Begriff isch, en Zürcher het amel eifach de Traktor uf de Etikette lustig gfunde aber nöd gwüsst, um was es goht. Jetzt hani min Likör gno, de Traktor uf dä Etikette nach Züri usgrichtet und scho isch die Gülle entstande. Gülle chaufe.

Berner sind hässig worde, weli mit de Gülle öpis für Zürcher gmacht ha, für sie aber nüt ka ha. Und sie leget ebe grosse Wert druf, dass Bschütti mit Ü gschriebe wird. Den hani mi halt überschnorre loh. Jetzt hani aber s'Problem mit de Etikette ka, noch rechts fahrt Bschötti, noch links Gülle. Do hani mir denkt ich montiere do eifach Schleppschlüch fürs Flachland, den isch gsetzlich au alles richtig. Bschütti chaufe.

Ufzmol chunt do au no s'Wallis hine füre. Luze, Luza oder Lutza, gemäss Walliser-Wörterbuech schriebt mer Lutza. Mit Schleppschlüch chasch i dem Gebirge döt nöd bschötte, drum wird au wieder ahständig umegsprützt. Im Hintergrund findsch au no s'Matterhorn. Lutza chaufe.